ភ្នំពេញ ៖ កម្លាំងនគរបាលប៉ុស្តិ៍បឹងត្របែកចាប់ឃាត់ខ្លួនបុរសម្នាកដែលបានក្លែងបន្លំជាព្រះសង្ឃពាក់ស្បង់ចីពរ ខណៈដែលរូបគេដើររៃអង្គាសប្រាក់ខុសពីប្រក្រតីតាមផ្ទះ និងទីសាធារណៈដែលករណីនេះ បានកើតឡើងនៅរសៀលថ្ងៃទី២ ខែវិច្ឆិកា ឆ្នាំ២០២០ នៅតាមបណ្តោយផ្លូវម៉ៅសេទុង ក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។ មន្ត្រីនគរបាលសង្កាត់បឹងត្របែកបានប្រាប់ឱ្យដឹងថា បុរសជនសង្ស័យដែលក្លែងបន្លំជាព្រះសង្ឃពាក់ស្បង់ចីពរដើររៃអង្គាសប្រាក់ដែលត្រូវបានចាប់ឃាត់ខ្លួនមានឈ្មោះ អិន ទេព អាយុ៣០ឆ្នាំ មានមុខរបរមិនពិតប្រាកដ ស្នាក់នៅម្តុំទួលសង្កែ មានស្រុកកំណើតនៅស្រុកកំពង់ត្រាច ខេត្តកំពត។ ប្រភពបន្តថា មុនពេលកើតហេតុ បុរសជាជនសង្ស័យ បានពាក់ស្បង់ចីពរបានក្លែងបន្លំជាព្រះសង្ឃកាន់ស្រោមសំបុត្របុណ្យដើររៃអង្គាសលុយតាមផ្ទះ និងតាមទីសាធារណៈនៅតាមបណ្តោយផ្លូវម៉ៅសេទុងទាំងថ្ងៃ ខុសពីព្រះសង្ឃធម្មតា។ ដោយមានការសង្ស័យ ប្រជាពលរដ្ឋក៏បានរាយការណ៍ប្រាប់សមត្ថកិច្ចតែម្តង។ ក្រោយឃាត់ខ្លួន សមត្ថកិច្ចបានដកហូតកាបូបមានទុកខោអាវចំនួន១កំប្លេ លាក់ទុកក្នុងថង់យាម លុយចំនួន៨ពាន់រៀល ស្រោមសំបុត្របុណ្យមួយចំនួនផងដែរ។ បុរសជាជនសង្ស័យក៏បានសារភាពបន្ថែមទៀតថា ខ្លួនគេក៏ធ្លាប់បួសជាព្រះសង្ឃនៅវត្តមួយនៅក្នុងខេត្តកំពត បានចំនួន១វស្សាដែរ និងបានសឹកវិញអស់រយៈពេល៣ឆ្នាំមកហើយ ទើបបានស្លៀកស្បង់ចីពរដើររៃអង្គាសលុយនៅពេលថ្ងៃ និងពេលយប់ស្លៀកពាក់ធ្វើជាមនុស្សធម្មតាវិញ។ សមត្ថកិច្ចបានឱ្យដឹងថា ជនក្លែងបន្លំជាសង្ឃបានធ្វើឱ្យខូចដល់ព្រះពុទ្ធសាសនា ទើបសម្រេចចាប់ឱ្យស្លៀកពាក់ខោអាវរបស់ខ្លួនជាមនុស្សធម្មតា និងបញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ចាត់ការទៅតាមនីតិវិធីច្បាប់៕
